hai agarche shahr mein apni shanasai bahut

hai agarche shahr meñ apnī shanāsā.ī bahut

phir bhī rahtā hai hameñ ehsās-e-tanhā.ī bahut

ab ye sochā hai ki apnī zaat meñ simTe raheñ

ham ne kar ke dekh lī sab se shanāsā.ī bahut

muñh chhupā kar āstīñ meñ der tak rote rahe

raat Dhaltī chāñdnī meñ us kī yaad aa.ī bahut

qatra qatra ashk-e-ġham āñkhoñ se āḳhir bah ga.e

ham ne palkoñ kī unheñ zanjīr pahnā.ī bahut

apnā saaya bhī judā lagtā hai apnī zaat se

ham ne us se dil lagāne kī sazā paa.ī bahut

ab to sail-e-dard tham jaa.e sakūñ dil ko mile

zaḳhm-e-dil meñ aa chukī hai ab to gahrā.ī bahut

shaam ke sāyoñ kī sūrat phailte jaate haiñ ham

lag rahī tañg ham ko ghar kī añgnā.ī bahut

aa.ina ban ke vo sūrat sāmne jab aa ga.ī

aks apnā dekh kar mujh ko hañsī aa.ī bahut

vo sahar tārīkiyoñ meñ aaj bhī rū-posh hai

jis ke ġham meñ kho chukī āñkhoñ kī bīnā.ī bahut

maiñ to jhoñkā thā asīr-e-dām kyā hotā 'kalīm'

us ne zulfoñ kī mujhe zanjīr pahnā.ī bahut

hai agarche shahr mein apni shanasai bahut

phir bhi rahta hai hamein ehsas-e-tanhai bahut

ab ye socha hai ki apni zat mein simTe rahen

hum ne kar ke dekh li sab se shanasai bahut

munh chhupa kar aastin mein der tak rote rahe

raat Dhalti chandni mein us ki yaad aai bahut

qatra qatra ashk-e-gham aankhon se aaKHir bah gae

hum ne palkon ki unhen zanjir pahnai bahut

apna saya bhi juda lagta hai apni zat se

hum ne us se dil lagane ki saza pai bahut

ab to sail-e-dard tham jae sakun dil ko mile

zaKHm-e-dil mein aa chuki hai ab to gahrai bahut

sham ke sayon ki surat phailte jate hain hum

lag rahi tang hum ko ghar ki angnai bahut

aaina ban ke wo surat samne jab aa gai

aks apna dekh kar mujh ko hansi aai bahut

wo sahar tarikiyon mein aaj bhi ru-posh hai

jis ke gham mein kho chuki aankhon ki binai bahut

main to jhonka tha asir-e-dam kya hota 'kalim'

us ne zulfon ki mujhe zanjir pahnai bahut