hai apne qatl ki dil-e-muztar ko ittilaa

hai apne qatl kī dil-e-muztar ko ittilā.a

gardan ko ittilā.a na ḳhanjar ko ittilā.a

be-parda aaj niklegā parda-nashīñ mirā

kar de ye koī mahr-e-munavvar ko ittilā.a

chhup-chhup ke ab jo niklo to ma.alūm ho maza

kar dī hai maiñ ne aap ke ghar bhar ko ittilā.a

bulbul na baaz aa.iyo fariyād-o-āh se

kab tak na hogī qalb-e-gul-e-tar ko ittilā.a

kis tarah kar diyā dil-e-nāzuk ko chuur chuur

is vāqi.a kī ḳhaak hai patthar ko ittilā.a

kyā kaam inqalāb kā kuchh bhī nahīñ yahāñ

daur-e-falak ke daura-e-sāġhar ko ittilā.a

haT jaa.e ik taraf but-e-kāfir kī raah se

de koī jald dauḌ ke mahshar ko ittilā.a

chalne bhī vo na paa.e the apne maqām se

pahle se ho ga.ī dil-e-muztar ko ittilā.a

maiñ saḳht-jāñ huuñ qasd kare dekh-bhāl kar

pahle se ho ga.ī hai ye ḳhanjar ko ittilā.a

'parvīñ' riyāz-e-ḳhuld meñ kis kis ko jaam deñ

pahle se hai ye sāqī-e-kausar ko ittilā.a

hai apne qatl ki dil-e-muztar ko ittilaa

gardan ko ittilaa na KHanjar ko ittilaa

be-parda aaj niklega parda-nashin mera

kar de ye koi mahr-e-munawwar ko ittilaa

chhup-chhup ke ab jo niklo to malum ho maza

kar di hai main ne aap ke ghar bhar ko ittilaa

bulbul na baz aaiyo fariyaad-o-ah se

kab tak na hogi qalb-e-gul-e-tar ko ittilaa

kis tarah kar diya dil-e-nazuk ko chur chur

is waqia ki KHak hai patthar ko ittilaa

kya kaam inqalab ka kuchh bhi nahin yahan

daur-e-falak ke daura-e-saghar ko ittilaa

haT jae ek taraf but-e-kafir ki rah se

de koi jald dauD ke mahshar ko ittilaa

chalne bhi wo na pae the apne maqam se

pahle se ho gai dil-e-muztar ko ittilaa

main saKHt-jaan hun qasd kare dekh-bhaal kar

pahle se ho gai hai ye KHanjar ko ittilaa

'parwin' riyaz-e-KHuld mein kis kis ko jam den

pahle se hai ye saqi-e-kausar ko ittilaa