hai asar is tarah dil par ishq ki tasir ka

hai asar is tarah dil par ishq kī tāsīr kā

āj-kal hai haal jaisā vādī-e-kashmīr kā

yuuñ to duniyā kā koī manzar mujhe bhāyā nahīñ

haañ magar shaidā huā huuñ maiñ tirī tasvīr kā

hai mirī duniyā meñ terī ahmiyat kuchh is tarah

martaba hai shā.erī meñ jis tarah se 'mīr' kā

yaad tum aaoge mujh ko merī jaañ ye jaan lo

zikr jab bhī aa.egā merī ġhazal meñ hiir kā

maiñ ne to bas ain likkhā thā lifāfe par magar

jaane kyā samjhā hai matlab us ne is tahrīr kā

tum se milnā aur phir mil kar bichhaḌ jaane kā ġham

faisla shāyad yahī hai kātib-e-taqdīr kā

sher maiñ ne bhī sunā.e ḳhuub 'rāhī' rāt-bhar

zikr chheḌā thā kisī ne bazm meñ jab 'mīr' kā

hai asar is tarah dil par ishq ki tasir ka

aaj-kal hai haal jaisa wadi-e-kashmir ka

yun to duniya ka koi manzar mujhe bhaya nahin

han magar shaida hua hun main teri taswir ka

hai meri duniya mein teri ahmiyat kuchh is tarah

martaba hai shaeri mein jis tarah se 'mir' ka

yaad tum aaoge mujh ko meri jaan ye jaan lo

zikr jab bhi aaega meri ghazal mein hir ka

main ne to bas ain likkha tha lifafe par magar

jaane kya samjha hai matlab us ne is tahrir ka

tum se milna aur phir mil kar bichhaD jaane ka gham

faisla shayad yahi hai katib-e-taqdir ka

sher main ne bhi sunae KHub 'rahi' raat-bhar

zikr chheDa tha kisi ne bazm mein jab 'mir' ka