ہے باغ تمنا کی بہار اپنی جگہ خوب

ہے باغ تمنا کی بہار اپنی جگہ خوب

گل اپنی جگہ خوب ہیں خار اپنی جگہ خوب

یہ خیمہ زنی راہ میں اپنی جگہ اچھی

اٹھتا ہوا منزل پہ غبار اپنی جگہ خوب

ہم جتنے طلب گار وہ اتنا ہی گریزاں

ہم اپنی جگہ خوب ہیں یار اپنی جگہ خوب

کم اپنی جگہ دشت مسافت میں نہیں ہے

مانا کہ ہیں یہ شہر و دیار اپنی جگہ خوب

مل جائے جو قید غم دنیا سے رہائی

پھر تو ہے ترے غم کا حصار اپنی جگہ خوب

پھر ایک بھی پل عرصۂ محشر سے نہیں کم

کچھ دیر ستاروں کا شمار اپنی جگہ خوب

بے صبرئ ہجراں میں بھی اک بات ہے خاورؔ

ہر چند کہ ہیں صبر و قرار اپنی جگہ خوب