hai bagh-e-tamanna ki bahaar apni jagah KHub

hai bāġh-e-tamannā kī bahār apnī jagah ḳhuub

gul apnī jagah ḳhuub haiñ ḳhaar apnī jagah ḳhuub

ye ḳhema-zanī raah meñ apnī jagah achchhī

uThtā huā manzil pe ġhubār apnī jagah ḳhuub

ham jitne talabgār vo utnā hī gurezāñ

ham apnī jagah ḳhuub haiñ yaar apnī jagah ḳhuub

kam apnī jagah dasht-e-masāfat meñ nahīñ hai

maanā ki haiñ ye shahr-o-dayār apnī jagah ḳhuub

mil jaa.e jo qaid-e-ġham-e-duniyā se rihā.ī

phir to hai tire ġham kā hisār apnī jagah ḳhuub

phir ek bhī pal arsa-e-mahshar se nahīñ kam

kuchh der sitāroñ kā shumār apnī jagah ḳhuub

be-sabrī-e-hijrāñ meñ bhī ik baat hai 'ḳhāvar'

har-chand ki haiñ sabr-o-qarār apnī jagah ḳhuub

hai bagh-e-tamanna ki bahaar apni jagah KHub

gul apni jagah KHub hain KHar apni jagah KHub

ye KHema-zani rah mein apni jagah achchhi

uThta hua manzil pe ghubar apni jagah KHub

hum jitne talabgar wo utna hi gurezan

hum apni jagah KHub hain yar apni jagah KHub

kam apni jagah dasht-e-masafat mein nahin hai

mana ki hain ye shahr-o-dayar apni jagah KHub

mil jae jo qaid-e-gham-e-duniya se rihai

phir to hai tere gham ka hisar apni jagah KHub

phir ek bhi pal arsa-e-mahshar se nahin kam

kuchh der sitaron ka shumar apni jagah KHub

be-sabri-e-hijran mein bhi ek baat hai 'KHawar'

har-chand ki hain sabr-o-qarar apni jagah KHub