hai baal-o-par mein wahshat si be-samt uDanen bharti hun

hai bāl-o-par meñ vahshat sī be-samt uḌāneñ bhartī huuñ

apne andar ke jañgal meñ gum ho jaane se Dartī huuñ

phir aas kā dariyā bahtā hai phir sabza ug ug aatā hai

phir dhuup kināre baiThī maiñ ik ḳhvāb kī chhāgal bhartī huuñ

kyoñ aag dahaktī hai mujh meñ kyoñ bārish hotī hai mujh meñ

jab dhyān se miltī huuñ tere jab tere man meñ utartī huuñ

kab mujh ko rihā.ī miltī thī nāhaq jo qafas bhī toḌ diyā

baj uThtī haiñ zanjīreñ sī maiñ paañv jahāñ bhī dhartī huuñ

ik phuul kī patī kā bistar ik os ke motī kā takiya

titlī ke paroñ ko oḌh ke maiñ ḳhvāboñ meñ aan Thahartī huuñ

dil ġham se rihā.ī chāhtā hai aur vo bhī jiite jī sāhab

phir tujh meñ panah le letī huuñ phir ḳhud se kināra kartī huuñ

haiñ naag kā phan kaalī rāteñ lamha lamha Dastī jāveñ

sau baar taḌaptī huuñ sāhab sau baar maiñ jiitī martī huuñ

hai baal-o-par mein wahshat si be-samt uDanen bharti hun

apne andar ke jangal mein gum ho jaane se Darti hun

phir aas ka dariya bahta hai phir sabza ug ug aata hai

phir dhup kinare baiThi main ek KHwab ki chhagal bharti hun

kyon aag dahakti hai mujh mein kyon barish hoti hai mujh mein

jab dhyan se milti hun tere jab tere man mein utarti hun

kab mujh ko rihai milti thi nahaq jo qafas bhi toD diya

baj uThti hain zanjiren si main panw jahan bhi dharti hun

ek phul ki pati ka bistar ek os ke moti ka takiya

titli ke paron ko oDh ke main KHwabon mein aan Thaharti hun

dil gham se rihai chahta hai aur wo bhi jite ji sahab

phir tujh mein panah le leti hun phir KHud se kinara karti hun

hain nag ka phan kali raaten lamha lamha Dasti jawen

sau bar taDapti hun sahab sau bar main jiti marti hun