ہے بہار اپنی گل اپنے ہیں نہ گلشن اپنا

ہے بہار اپنی گل اپنے ہیں نہ گلشن اپنا

ہے قفس ہم جسے سمجھے تھے نشیمن اپنا

نذر بد ذوقیٔ گلچیں تو ہوئے لالہ و گل

اور کانٹوں کو بھی ترسا کیا دامن اپنا

برق تنکوں کو جلاتی ہے جلائے لیکن

ہم یہیں اور بنا لیں گے نشیمن اپنا

میری محرومی کے دم سے ہے حمیت کا بھرم

سامنے ان کے نہ پھیلا کبھی دامن اپنا

آج بھی جن کو ہے دعویٰ نظام جمہور

دل کے آئینے میں دیکھیں رخ روشن اپنا

میرے زخموں کو اگر آپ نہ دیکھیں نہ سہی

خون آلود ہے کیوں دیکھیے دامن اپنا

ہم نے اپنوں کو بھی بیگانہ کیا جس کے لئے

آج تک بن نہ سکا وہ بت پر فن اپنا

پھر کریں قوم کو تلقین مذاہب طلعتؔ

جائزہ پہلے تو لیں شیخ و برہمن اپنا