hai bahaar apni gul apne hain na gulshan apna

hai bahār apnī gul apne haiñ na gulshan apnā

hai qafas ham jise samjhe the nasheman apnā

nazr-e-bad-zauqī-e-gulchīñ to hue lāla-o-gul

aur kāñToñ ko bhī tarsā kiyā dāman apnā

barq tinkoñ ko jalātī hai jalā.e lekin

ham yahīñ aur banā leñge nasheman apnā

merī mahrūmī ke dam se hai hamiyyat kā bharam

sāmne un ke na phailā kabhī dāman apnā

aaj bhī jin ko hai da.avā-e-nizām-e-jamhūr

dil ke ā.īne meñ dekheñ ruḳh-e-raushan apnā

mere zaḳhmoñ ko agar aap na dekheñ na sahī

ḳhūn-ālūd hai kyoñ dekhiye dāman apnā

ham ne apnoñ ko bhī begāna kiyā jis ke liye

aaj tak ban na sakā vo but-e-pur-fan apnā

phir kareñ qaum ko talqīn-e-mazāhib 'tal.at'

jā.eza pahle to leñ shaiḳh-o-barahman apnā

hai bahaar apni gul apne hain na gulshan apna

hai qafas hum jise samjhe the nasheman apna

nazr-e-bad-zauqi-e-gulchin to hue lala-o-gul

aur kanTon ko bhi tarsa kiya daman apna

barq tinkon ko jalati hai jalae lekin

hum yahin aur bana lenge nasheman apna

meri mahrumi ke dam se hai hamiyyat ka bharam

samne un ke na phaila kabhi daman apna

aaj bhi jin ko hai dawa-e-nizam-e-jamhur

dil ke aaine mein dekhen ruKH-e-raushan apna

mere zaKHmon ko agar aap na dekhen na sahi

KHun-alud hai kyon dekhiye daman apna

hum ne apnon ko bhi begana kiya jis ke liye

aaj tak ban na saka wo but-e-pur-fan apna

phir karen qaum ko talqin-e-mazahib 'talat'

jaeza pahle to len shaiKH-o-barahman apna