hai barabar use mila na mila

hai barābar use milā na milā

jis ko jiine kā hausla na milā

aaheñ ghuT ghuT ke ban ga.iiñ aañsū

jab nikalne ko rāsta na milā

yuuñ to jiine ko jī rahe haiñ ham

zindagī kā magar maza na milā

ḳhuun ho kar bahā phir āñkhoñ se

dil ko jab koī aasrā na milā

un ko DhūñDūñ to kis umiid pe ab

mujh ko apnā hī jab pata na milā

zindagī se umiid kyā rakkhūñ

maut kā bhī to aasrā na milā

bul-havas ne kiye hazār jatan

phir bhī qismat se kuchh sivā na milā

kaun mushkil thā un kā vasl magar

dil hī qismat se kaam kā na milā

un kā ġham to nasīb hai mujh ko

aish kā kyā milā milā na milā

kī bahut justujū magar 'sāhir'

koī bhī dard-āshnā na milā

hai barabar use mila na mila

jis ko jine ka hausla na mila

aahen ghuT ghuT ke ban gain aansu

jab nikalne ko rasta na mila

yun to jine ko ji rahe hain hum

zindagi ka magar maza na mila

KHun ho kar baha phir aankhon se

dil ko jab koi aasra na mila

un ko DhunDun to kis umid pe ab

mujh ko apna hi jab pata na mila

zindagi se umid kya rakkhun

maut ka bhi to aasra na mila

bul-hawas ne kiye hazar jatan

phir bhi qismat se kuchh siwa na mila

kaun mushkil tha un ka wasl magar

dil hi qismat se kaam ka na mila

un ka gham to nasib hai mujh ko

aish ka kya mila mila na mila

ki bahut justuju magar 'sahir'

koi bhi dard-ashna na mila