hai dard ke intisab sa kuchh

hai dard ke intisāb sā kuchh

vo yaad āñgan meñ ḳhvāb sā kuchh

vo ārzūeñ vo tishna-kāmī

had-e-nigah tak sarāb sā kuchh

vo hijratoñ ke udaas mausam

safar safar iztirāb sā kuchh

har ik ta.alluq shikast-mā.il

ravish ravish inqilāb sā kuchh

vo mish.al-e-jāñ bujhī bujhī sī

koī bikharte gulāb sā kuchh

vo phuul hāthoñ meñ sañg-pāre

vo ek paisa hisāb sā kuchh

vo us ke dil meñ savāl jaisā

mire laboñ pe javāb sā kuchh

bas ek hālat meñ hī milā vo

garhan meñ āftāb sā kuchh

hai dard ke intisab sa kuchh

wo yaad aangan mein KHwab sa kuchh

wo aarzuen wo tishna-kaami

had-e-nigah tak sarab sa kuchh

wo hijraton ke udas mausam

safar safar iztirab sa kuchh

har ek talluq shikast-mail

rawish rawish inqilab sa kuchh

wo mishal-e-jaan bujhi bujhi si

koi bikharte gulab sa kuchh

wo phul hathon mein sang-pare

wo ek paisa hisab sa kuchh

wo us ke dil mein sawal jaisa

mere labon pe jawab sa kuchh

bas ek haalat mein hi mila wo

garhan mein aaftab sa kuchh