hai dard mein Dubi hui tahrir ki aawaz

hai dard meñ Duubī huī tahrīr kī āvāz

vijdān ko chhū letī hai tasvīr kī āvāz

tanhā.ī meñ āñkhoñ se nikal aate haiñ aañsū

goyā hai fazā meñ kisī dil-gīr kī āvāz

dīvāna-e-hastī ke liye ek haiñ donoñ

pāzeb kī jhankār ki shamshīr kī āvāz

yaad aayā hai jab sāneha zindān-e-balā kā

ubhrī dar-o-dīvār se zanjīr kī āvāz

lag jaatī hai jab rāh-e-pur-asrār meñ Thokar

ham us ko samajh lete haiñ taqdīr kī āvāz

taḳhrīb-pasandoñ ne vo tūfān uThāyā

is shor meñ kho jaa.e na ta.amīr kī āvāz

naġhmoñ kā asar hotā hai arbāb-e-tarab par

'nāzir' ko rulā detī hai zanjīr kī āvāz

hai dard mein Dubi hui tahrir ki aawaz

wijdan ko chhu leti hai taswir ki aawaz

tanhai mein aankhon se nikal aate hain aansu

goya hai faza mein kisi dil-gir ki aawaz

diwana-e-hasti ke liye ek hain donon

pazeb ki jhankar ki shamshir ki aawaz

yaad aaya hai jab saneha zindan-e-bala ka

ubhri dar-o-diwar se zanjir ki aawaz

lag jati hai jab rah-e-pur-asrar mein Thokar

hum us ko samajh lete hain taqdir ki aawaz

taKHrib-pasandon ne wo tufan uThaya

is shor mein kho jae na tamir ki aawaz

naghmon ka asar hota hai arbab-e-tarab par

'nazir' ko rula deti hai zanjir ki aawaz