hai dil-e-nakaam-e-ashiq mein tumhaari yaad bhi

hai dil-e-nākām-e-āshiq meñ tumhārī yaad bhī

ye bhī kyā ghar hai ki hai barbād bhī ābād bhī

dil ke miTne kā mujhe kuchh aur aisā ġham nahīñ

haañ magar itnā ki hai is meñ tumhārī yaad bhī

kis ko ye samjhā.iye nairañg-e-kār-e-āshiqī

tham ga.e ashk-e-musalsal ruk ga.ī fariyād bhī

siine meñ dard-e-mohabbat raaz ban kar rah gayā

ab vo hālat hai ki kar sakte nahīñ fariyād bhī

phaaḌ Dālūñgā garebāñ phoḌ lūñgā apnā sar

hai mire āfat-kade meñ qais bhī farhād bhī

kuchh to 'asġhar' mujh meñ hai qaa.im hai jis se zindagī

jaan bhī kahte haiñ us ko aur un kī yaad bhī

hai dil-e-nakaam-e-ashiq mein tumhaari yaad bhi

ye bhi kya ghar hai ki hai barbaad bhi aabaad bhi

dil ke miTne ka mujhe kuchh aur aisa gham nahin

han magar itna ki hai is mein tumhaari yaad bhi

kis ko ye samjhaiye nairang-e-kar-e-ashiqi

tham gae ashk-e-musalsal ruk gai fariyaad bhi

sine mein dard-e-mohabbat raaz ban kar rah gaya

ab wo haalat hai ki kar sakte nahin fariyaad bhi

phaD Dalunga gareban phoD lunga apna sar

hai mere aafat-kade mein qais bhi farhad bhi

kuchh to 'asghar' mujh mein hai qaim hai jis se zindagi

jaan bhi kahte hain us ko aur un ki yaad bhi