hai dil ko mere aariz-e-jaanan se irtibaat

hai dil ko mere āriz-e-jānāñ se irtibāt

bulbul ko jis tarah ho gulistāñ se irtibāt

mujh dard-mañd-e-ishq kī tadbīr hai abas

hogā na mere dard ko darmāñ se irtibāt

banda huuñ ishq kā nahīñ maz.hab se mujh ko kaam

kyūñkar karūñ maiñ gabrū musalmāñ se irtibāt

hai rabt mujh ko kūcha-e-jānāñ se roz-o-shab

majnūñ ko jis tarah thā bayābāñ se irtibāt

maz.hab hai merā ishq aur rindī hai merā kaam

hai kufr se na mujh ko na īmāñ se irtibāt

hai rabt mujh ko qāmat-e-jānāñ se jis tarah

qumrī kā hove sarv-e-gulistāñ se irtibāt

'āsim' jahān meñ shah-e-ḳhādim ke maiñ sivā

kāfir huuñ gar karūñ kisī insāñ se irtibāt

hai dil ko mere aariz-e-jaanan se irtibaat

bulbul ko jis tarah ho gulistan se irtibaat

mujh dard-mand-e-ishq ki tadbir hai abas

hoga na mere dard ko darman se irtibaat

banda hun ishq ka nahin mazhab se mujh ko kaam

kyunkar karun main gabru musalman se irtibaat

hai rabt mujh ko kucha-e-jaanan se roz-o-shab

majnun ko jis tarah tha bayaban se irtibaat

mazhab hai mera ishq aur rindi hai mera kaam

hai kufr se na mujh ko na iman se irtibaat

hai rabt mujh ko qamat-e-jaanan se jis tarah

qumri ka howe sarw-e-gulistan se irtibaat

'asim' jahan mein shah-e-KHadim ke main siwa

kafir hun gar karun kisi insan se irtibaat