hai dil mein ehsas-e-dard ab tak agarche diwana ho gaya hun

hai dil meñ ehsās-e-dard ab tak agarche dīvāna ho gayā huuñ

jahāñ ḳhudī hai na be-ḳhudī hai ik aisī duniyā meñ kho gayā huuñ

havā muāfiq bhī ho azīzo to us kināre se duur rahnā

maiñ bārhā aa ke us kināre pe apnī kashtī Dubo gayā huuñ

yahī to anjām-e-justujū hai ki Thokareñ khā ke but-kadoñ kī

jabīn-e-rusvā ko rakh ke apnī haram kī chaukhaT pe so gayā huuñ

ye nāz-parvardagān-e-fitrat mirī asīrī ko ḳhaak samjheñ

milā hai kuchh iḳhtiyār jab se maiñ aur majbūr ho gayā huuñ

jo qāfila is taraf se guzre vo ek Thokar mujhe lagā de

'jamīl' maiñ biich rāste meñ isī bharose pa so gayā huuñ

hai dil mein ehsas-e-dard ab tak agarche diwana ho gaya hun

jahan KHudi hai na be-KHudi hai ek aisi duniya mein kho gaya hun

hawa muafiq bhi ho azizo to us kinare se dur rahna

main barha aa ke us kinare pe apni kashti Dubo gaya hun

yahi to anjam-e-justuju hai ki Thokaren kha ke but-kadon ki

jabin-e-ruswa ko rakh ke apni haram ki chaukhaT pe so gaya hun

ye naz-parwardagan-e-fitrat meri asiri ko KHak samjhen

mila hai kuchh iKHtiyar jab se main aur majbur ho gaya hun

jo qafila is taraf se guzre wo ek Thokar mujhe laga de

'jamil' main bich raste mein isi bharose pa so gaya hun