hai dil mein ek baat jise dar-ba-dar kahen

hai dil meñ ek baat jise dar-ba-dar kaheñ

har chand us meñ jaan bhī jaa.e magar kaheñ

mashshāt-gān-e-kākul-e-sham.a-ḳhayāl sab

kis ko harīf-e-jalva-e-barq-e-nazar kaheñ

parchhā.iyāñ bhī chhoḌ ga.iiñ be-kasī meñ saath

ab ai shab-e-hayāt kise ham-safar kaheñ

phaile ġhubār-e-rang-e-darūñ to savād-e-shām

phūTe lahū to mauj-e-ḳhirām-e-sahar kaheñ

juz harf-e-shauq kis ko kaheñ gulshan-e-samā

juz naqsh-e-nāz kis ko nashīd-e-nazar kaheñ

Toko unheñ na laġhzish-e-guftār dekh kar

ye log vo haiñ jin ko ḳhudā-e-hunar kaheñ

'urfī' gadā-e-shahr kī sūrat agar mile

iqlīm-e-shā.irī kā use tājvar kaheñ

hai dil mein ek baat jise dar-ba-dar kahen

har chand us mein jaan bhi jae magar kahen

mashshat-gan-e-kakul-e-shama-KHayal sab

kis ko harif-e-jalwa-e-barq-e-nazar kahen

parchhaiyan bhi chhoD gain be-kasi mein sath

ab ai shab-e-hayat kise ham-safar kahen

phaile ghubar-e-rang-e-darun to sawad-e-sham

phuTe lahu to mauj-e-KHiram-e-sahar kahen

juz harf-e-shauq kis ko kahen gulshan-e-sama

juz naqsh-e-naz kis ko nashid-e-nazar kahen

Toko unhen na laghzish-e-guftar dekh kar

ye log wo hain jin ko KHuda-e-hunar kahen

'urfi' gada-e-shahr ki surat agar mile

iqlim-e-shairi ka use tajwar kahen