hai garm intiKHab ka bazar dekhna

hai garm intiḳhāb kā bāzār dekhnā

ahl-e-havas ke bikne kī raftār dekhnā

hoñge sitam ke hāthoñ giraftār be-gunāh

tauhīn-e-adl bar-sar-e-darbār dekhnā

tārīḳh apne ḳhuun se likkheñge phir hamīñ

paidā hue haiñ phir vahī āsār dekhnā

mere vatan kī aan pe aane na degā aañch

koī to hogā sāhib-e-kirdār dekhnā

dikhlā.egā ye vaqt karishme na.e na.e

insān ko parakhne kā me.aar dekhnā

ham chāhte haiñ bazm meñ aisī jagah mile

mumkin ho terī samt lagātār dekhnā

haq baat kah ga.ī hai bharī bazm meñ 'ġhazal'

is daur meñ ye jur.at-e-iz.hār dekhnā

hai garm intiKHab ka bazar dekhna

ahl-e-hawas ke bikne ki raftar dekhna

honge sitam ke hathon giraftar be-gunah

tauhin-e-adl bar-sar-e-darbar dekhna

tariKH apne KHun se likkhenge phir hamin

paida hue hain phir wahi aasar dekhna

mere watan ki aan pe aane na dega aanch

koi to hoga sahib-e-kirdar dekhna

dikhlaega ye waqt karishme nae nae

insan ko parakhne ka mear dekhna

hum chahte hain bazm mein aisi jagah mile

mumkin ho teri samt lagatar dekhna

haq baat kah gai hai bhari bazm mein 'ghazal'

is daur mein ye jurat-e-izhaar dekhna