hai ghazal mein jo meri midhat-e-ruKHsar bahut

hai ġhazal meñ jo mirī mid.hat-e-ruḳhsār bahut

apnā matla' bhī huā matla'-e-anvār bahut

husn vaale na hoñ kyoñ dil ke talabgār bahut

jins achchhī ho to milte haiñ ḳharīdār bahut

naqd-e-jāñ tak liye aate haiñ ḳharīdār bahut

auj par husn kī hai garmī-e-bāzār bahut

kyoñ na mas.hūr kare sehr-bayānī un kī

phuul jhaḌte haiñ dahan se dam-e-guftār bahut

aap apnā koī vā'da to vafā karte nahīñ

mujh se ulfat kā liyā karte haiñ iqrār bahut

farsh-o-bālīñ kā ye sāmān kahāñ se laa.eñ

vahshiyoñ ke liye hai sāya-e-dīvār bahut

manzil-e-ishq-o-mohabbat hai nihāyat dushvār

Thokareñ khāte haiñ is raah meñ hushiyār bahut

vasl kī baat tavajjoh se vo sunte hī nahīñ

un kā iqrār hai kam aur hai inkār bahut

dāman un kā kabhī ālūda-e-isyāñ na huā

phir bhī nādim rahe nā-karda gunahgār bahut

hai ghazal mein jo meri midhat-e-ruKHsar bahut

apna matla' bhi hua matla'-e-anwar bahut

husn wale na hon kyon dil ke talabgar bahut

jins achchhi ho to milte hain KHaridar bahut

naqd-e-jaan tak liye aate hain KHaridar bahut

auj par husn ki hai garmi-e-bazar bahut

kyon na mashur kare sehr-bayani un ki

phul jhaDte hain dahan se dam-e-guftar bahut

aap apna koi wa'da to wafa karte nahin

mujh se ulfat ka liya karte hain iqrar bahut

farsh-o-baalin ka ye saman kahan se laen

wahshiyon ke liye hai saya-e-diwar bahut

manzil-e-ishq-o-mohabbat hai nihayat dushwar

Thokaren khate hain is rah mein hushiyar bahut

wasl ki baat tawajjoh se wo sunte hi nahin

un ka iqrar hai kam aur hai inkar bahut

daman un ka kabhi aaluda-e-isyan na hua

phir bhi nadim rahe na-karda gunahgar bahut