hai hamari dosti ka yahi muKHtasar fasana

hai hamārī dostī kā yahī muḳhtasar fasāna

tirā shauq-e-ḳhud-numā.ī mirā zauq-e-āshiqāna

hai hamārī zindagī par kisī aur kā tasallut

na to ye tirā zamāna na to ye mirā zamāna

tirī be-ruḳhī kā shikva tirī dostī kā da.avā

mujhe Dar hai ban na jaa.e mirī qaid kā bahāna

ye ajiib kashmakash hai ki haiñ ham baham muqābil

mirā dil tirā nishāna tirā dil mirā nishāna

hai ye aadmī patañgā isī sham-e-ārzū kā

kabhī aarzū haqīqat kabhī aarzū fasāna

tirī chaah thī jo dil meñ vahī ruuh thī badan meñ

ye idhar huī ravāna vo udhar huī ravāna

mirā dil jalāne vaale zarā is pe ġhaur kar le

mirā dil nahīñ hai zālim hai ye terā āshiyāna

hai hamari dosti ka yahi muKHtasar fasana

tera shauq-e-KHud-numai mera zauq-e-ashiqana

hai hamari zindagi par kisi aur ka tasallut

na to ye tera zamana na to ye mera zamana

teri be-ruKHi ka shikwa teri dosti ka dawa

mujhe Dar hai ban na jae meri qaid ka bahana

ye ajib kashmakash hai ki hain hum baham muqabil

mera dil tera nishana tera dil mera nishana

hai ye aadmi patanga isi sham-e-arzu ka

kabhi aarzu haqiqat kabhi aarzu fasana

teri chah thi jo dil mein wahi ruh thi badan mein

ye idhar hui rawana wo udhar hui rawana

mera dil jalane wale zara is pe ghaur kar le

mera dil nahin hai zalim hai ye tera aashiyana