hai haqiqat ek lekin kitne afsane bane

hai haqīqat ek lekin kitne afsāne bane

saiñkaḌoñ ka.abe bane lākhoñ sanam-ḳhāne bane

ġham rahā sāġhar bane pur-kaif paimāne bane

ham se hī ai muġhbachoñ maiḳhāne maiḳhāne bane

ibtidā ye thī ki ham banñe chale the hosh-mand

intihā ye hai ki bante bante dīvāne bane

baat hai dar-asl ye sab apne apne zarf kī

jab na kuchh yāroñ se ban aa.ī to dīvāne bane

kuchh na kah qāsid diyā us sang-dil ne kyā javāb

apnī jān-e-nā-tavāñ par kyā ḳhudā jaane bane

un kī hī ism-e-girāmī kā faqat charchā nahīñ

kuchh hamāre naam naamī se bhī afsāne bane

chehra-e-gul-gūn-e-sāqī se jo Tapkī mai banī

mast āñkhoñ se jo nikle Dhal ke paimāne bane

ruḳh ke shaidā chāñd taare zulf par rāteñ nisār

tere bhī ai sham.a-e-ḳhūbī kitne parvāne bane

ḳhuub chal niklī hai qais-o-kohkan kī dāstāñ

aql vaale bhī jise sun sun ke dīvāne bane

phuul gulshan meñ rahe ban kar sharāb-e-rang-o-bū

mai-kade meñ jab yahī pahuñche to paimāne bane

pūchhte haiñ kis tajāhul se ki ye 'muslim' hai kaun

uf re ham shahr-e-butāñ meñ aise begāne bane

hai haqiqat ek lekin kitne afsane bane

sainkaDon kabe bane lakhon sanam-KHane bane

gham raha saghar bane pur-kaif paimane bane

hum se hi ai mughbachon maiKHane maiKHane bane

ibtida ye thi ki hum banne chale the hosh-mand

intiha ye hai ki bante bante diwane bane

baat hai dar-asl ye sab apne apne zarf ki

jab na kuchh yaron se ban aai to diwane bane

kuchh na kah qasid diya us sang-dil ne kya jawab

apni jaan-e-na-tawan par kya KHuda jaane bane

un ki hi ism-e-girami ka faqat charcha nahin

kuchh hamare nam nami se bhi afsane bane

chehra-e-gul-gun-e-saqi se jo Tapki mai bani

mast aankhon se jo nikle Dhal ke paimane bane

ruKH ke shaida chand tare zulf par raaten nisar

tere bhi ai shama-e-KHubi kitne parwane bane

KHub chal nikli hai qais-o-kohkan ki dastan

aql wale bhi jise sun sun ke diwane bane

phul gulshan mein rahe ban kar sharab-e-rang-o-bu

mai-kade mein jab yahi pahunche to paimane bane

puchhte hain kis tajahul se ki ye 'muslim' hai kaun

uf re hum shahr-e-butan mein aise begane bane