hai ibtida-e-gham-e-ishq roe jate hain

hai ibtidā-e-ġham-e-ishq ro.e jaate haiñ

libās rañgne se pahle bhigo.e jaate haiñ

satā rahā hai mire ḳhūn-e-nāravā kā ḳhayāl

vo niiñd meñ haiñ magar haath dho.e jaate haiñ

rahe hamesha ye fankār be-niyāz-e-sitam

qalam kī nok lahū meñ Dubo.e jaate haiñ

vo dekh dekh ke shādāb lāla-zār-e-jigar

ġhamoñ ke biij mire dil meñ bo.e jaate haiñ

havās yūrish-e-tahzīb-e-nau meñ gum jo hue

ham apne gauhar-e-aqdār kho.e jaate haiñ

kahāñ se 'barq' ne andāz-e-fikr-o-fan ke liye

ġhazal meñ dard ke jauhar samo.e jaate haiñ

hai ibtida-e-gham-e-ishq roe jate hain

libas rangne se pahle bhigoe jate hain

sata raha hai mere KHun-e-narawa ka KHayal

wo nind mein hain magar hath dhoe jate hain

rahe hamesha ye fankar be-niyaz-e-sitam

qalam ki nok lahu mein Duboe jate hain

wo dekh dekh ke shadab lala-zar-e-jigar

ghamon ke bij mere dil mein boe jate hain

hawas yurish-e-tahzib-e-nau mein gum jo hue

hum apne gauhar-e-aqdar khoe jate hain

kahan se 'barq' ne andaz-e-fikr-o-fan ke liye

ghazal mein dard ke jauhar samoe jate hain