hai intizar faqat phir bahaar aane ka

hai intizār faqat phir bahār aane kā

pata lagā.egā sayyād āshiyāne kā

bulāyā bazm meñ phir āñkh-bhar nahīñ dekhā

malāl kyā mire māyūs lauT jaane kā

marā jo gaañv meñ fāqoñ se us kā so.em hai

kiyā hai miir ne ye intizām khāne kā

badal gayā huuñ ki hālāt kā taqāza thā

javāz koī nahīñ paas tere aane kā

huā huuñ duur jo apnoñ se sar pe ban aa.ī

baḌā junūn thā pardes meñ kamāne kā

girānī hoñToñ kī muskān le uḌī yaaro

bahāna DhūñD ke laayā huuñ muskurāne kā

paḌā hai auñdhā mohabbat kā shahsavār thā jo

baḌā thā shauq use baḳht āzmāne kā

kahā-sunā jo kabhī tum muaaf kar denā

ḳhayāl dil se nikālā hai tum ko paane kā

kabhī to bin-kahe bhī baat maan letā thā

'rashīd' gur use aayā hai ab satāne kā

hai intizar faqat phir bahaar aane ka

pata lagaega sayyaad aashiyane ka

bulaya bazm mein phir aankh-bhar nahin dekha

malal kya mere mayus lauT jaane ka

mara jo ganw mein faqon se us ka soem hai

kiya hai mir ne ye intizam khane ka

badal gaya hun ki haalat ka taqaza tha

jawaz koi nahin pas tere aane ka

hua hun dur jo apnon se sar pe ban aai

baDa junun tha pardes mein kamane ka

girani honTon ki muskan le uDi yaro

bahana DhunD ke laya hun muskurane ka

paDa hai aundha mohabbat ka shahsawar tha jo

baDa tha shauq use baKHt aazmane ka

kaha-suna jo kabhi tum muaf kar dena

KHayal dil se nikala hai tum ko pane ka

kabhi to bin-kahe bhi baat man leta tha

'rashid' gur use aaya hai ab satane ka