hai ishq mein nairangi-e-taslim-o-raza aur

hai ishq meñ nairangī-e-taslīm-o-razā aur

kartā huuñ agar shukr to samjhe hai gila aur

rindoñ kī navā aur hai saaqī kī navā aur

yā-rab sar-e-mai-ḳhāna koī mast ghaTā aur

afsāna-e-ġham itnā to dilchasp nahīñ thā

jab maiñ ne kiyā ḳhatm to zālim ne kahā aur

dil hīla-e-inkār-e-junūñ DhūñD rahā hai

haañ mere liye kuchh shikan-e-zulf-e-dotā aur

jab sabr kā yaarā hai to phir ġham kā maza kyā

ġham hī mirī qismat hai to ai mere ḳhudā aur

manzil hai zarā duur abhī kaif-e-balā kī

ai rind-e-ḳhush-anjām koī laġhzish-e-pā aur

hai kuchh to sabab kashmakash-e-shauq kā āḳhir

tum ne hī kahā aur ki maiñ ne hī sunā aur

dil mahviyat-e-ġham meñ huā sub.h-farāmosh

ai shaiḳh-e-haram aaj muazzin kī sadā aur

yā-rab mirī niyyat kī ḳhabar tujh ko to hogī

maiñ ye nahīñ kahtā ki farishtoñ ne likhā aur

kyā jaane kahāñ ḳhatm ho ashkoñ kī kahānī

phir un ke tabassum se ik afsāna chhiḌā aur

mahrūm-e-mohabbat ise kyā samjhegā 'jauhar'

gulshan kī havā aur hai dāman kī havā aur

hai ishq mein nairangi-e-taslim-o-raza aur

karta hun agar shukr to samjhe hai gila aur

rindon ki nawa aur hai saqi ki nawa aur

ya-rab sar-e-mai-KHana koi mast ghaTa aur

afsana-e-gham itna to dilchasp nahin tha

jab main ne kiya KHatm to zalim ne kaha aur

dil hila-e-inkar-e-junun DhunD raha hai

han mere liye kuchh shikan-e-zulf-e-dota aur

jab sabr ka yara hai to phir gham ka maza kya

gham hi meri qismat hai to ai mere KHuda aur

manzil hai zara dur abhi kaif-e-bala ki

ai rind-e-KHush-anjam koi laghzish-e-pa aur

hai kuchh to sabab kashmakash-e-shauq ka aaKHir

tum ne hi kaha aur ki main ne hi suna aur

dil mahwiyat-e-gham mein hua subh-faramosh

ai shaiKH-e-haram aaj muazzin ki sada aur

ya-rab meri niyyat ki KHabar tujh ko to hogi

main ye nahin kahta ki farishton ne likha aur

kya jaane kahan KHatm ho ashkon ki kahani

phir un ke tabassum se ek afsana chhiDa aur

mahrum-e-mohabbat ise kya samjhega 'jauhar'

gulshan ki hawa aur hai daman ki hawa aur