hai jaise roz diwali si duniya duniya walon ki

hai jaise roz dīvālī sī duniyā duniyā vāloñ kī

hameñ bhī chaar din kī zindagī miltī ujāloñ kī

judā ġham hai judā ḳhushiyāñ judā din hai judā rāteñ

ye duniyā hī nirālī hai mohabbat karne vāloñ kī

zamāna ḳhūbsūrat hai zamāne meñ hasīñ lākhoñ

magar tasvīr to tum ho mire ḳhvāboñ ḳhayāloñ kī

kabhī tark-e-mohabbat tum karo sochā na thā maiñ ne

bhulā dī ek din hī meñ mohabbat tum ne sāloñ kī

zamāne ke varaq par ab likhūñgā dāstān-e-ġham

zabāñ bhī aa ga.ī mujh ko kitāboñ kī risāloñ kī

chhupā kar ek ā.īna rakhā hai maiñ ne bhī dil meñ

kabhī tasvīr le lūñgā sabhī maiñ husn vāloñ kī

javāb is kā sahī degā koī to is ko kholūñgā

banā kar ek gaThrī maiñ ne rakhī hai savāloñ kī

safar meñ zindagī ke ham ne ye dekhā hai ai 'arpit'

zarūrat paḌ hī jaatī hai kabhī sūkhe nivāloñ kī

hai jaise roz diwali si duniya duniya walon ki

hamein bhi chaar din ki zindagi milti ujalon ki

juda gham hai juda KHushiyan juda din hai juda raaten

ye duniya hi nirali hai mohabbat karne walon ki

zamana KHubsurat hai zamane mein hasin lakhon

magar taswir to tum ho mere KHwabon KHayalon ki

kabhi tark-e-mohabbat tum karo socha na tha main ne

bhula di ek din hi mein mohabbat tum ne salon ki

zamane ke waraq par ab likhunga dastan-e-gham

zaban bhi aa gai mujh ko kitabon ki risalon ki

chhupa kar ek aaina rakha hai main ne bhi dil mein

kabhi taswir le lunga sabhi main husn walon ki

jawab is ka sahi dega koi to is ko kholunga

bana kar ek gaThri main ne rakhi hai sawalon ki

safar mein zindagi ke hum ne ye dekha hai ai 'arpit'

zarurat paD hi jati hai kabhi sukhe niwalon ki