hai jis ke dil mein KHuda ki dahshat

hai jis ke dil meñ ḳhudā kī dahshat

use kahāñ hai qazā kī dahshat

mire charāġhoñ meñ hausla hai

Darā.egī kyā havā kī dahshat

vo zābta koī zābta hai

chhupī ho jis meñ anā kī dahshat

ham haq ko apne zarūr leñge

nahīñ hai terī sazā kī dahshat

qadam qadam tum sañbhal ke chalnā

hai is nagar meñ balā kī dahshat

azaab jaisā hai zard mausam

guloñ meñ phir hai fanā kī dahshat

chhupā.e phirte haiñ muñh añdhere

hai un meñ kitnī ziyā kī dahshat

ḳhamosh ab bhī haiñ mere dushman

hai un pe taarī sadā kī dahshat

yazīdiyoñ ke diloñ meñ 'shādāñ'

hai aaj bhī karbalā kī dahshat

hai jis ke dil mein KHuda ki dahshat

use kahan hai qaza ki dahshat

mere charaghon mein hausla hai

Daraegi kya hawa ki dahshat

wo zabta koi zabta hai

chhupi ho jis mein ana ki dahshat

hum haq ko apne zarur lenge

nahin hai teri saza ki dahshat

qadam qadam tum sanbhal ke chalna

hai is nagar mein bala ki dahshat

azab jaisa hai zard mausam

gulon mein phir hai fana ki dahshat

chhupae phirte hain munh andhere

hai un mein kitni ziya ki dahshat

KHamosh ab bhi hain mere dushman

hai un pe tari sada ki dahshat

yazidiyon ke dilon mein 'shadan'

hai aaj bhi karbala ki dahshat