hai karam us ka ki insan bhi azimushshan hua

hai karam us kā ki insāñ bhī azīmushshāñ huā

varna thī kyā baat jo nūr-e-ḳhudā hairāñ huā

kyā kare tārīf us kī vo bhī banda-e-ḳhudā

jis pe ye zī-rūh kyā aalam sabhī nāzāñ huā

us ke kun kahne se aalam aur phir kyā kyā banā

aql-e-insānī se be-shak raaz ye pinhāñ huā

jab hai saarī kā.enāt us kī ibādat meñ magan

to use kyā gar jo koī munkir-e-yazdāñ huā

āzmā.ish to ḳhalīlullāh kī puurī huī

ba.ad is ke kaise kaise aadmī qurbāñ huā

haañ vahāñ hogā mayassar iḳhtiyār

maiñ na jānūñ phir mirā kyūñkar na kam armāñ huā

zulm insāñ par musalsal hai kiyā kis ne suno

murtakib is jurm kā haa.e ki bas insāñ huā

ai bayābāñ in daraḳhshāñ shahroñ se thī kyā jalan

jo tirī sūrat kī mānind shahar ye vīrāñ huā

is tarah shāyad salāmat tā-qayāmat tū rahe

ho mubārak ab tirā dushman tirā darbāñ huā

darja-e-uzmā pe faa.ez to yahāñ insāf hai

be-qusūroñ va be-basoñ kā muntazir zindāñ huā

yuuñ to hasrat zindagī saarī musalmāñ hī rahā

vaqt-e-āḳhir vo magar maiñ sāhab-e-īmāñ huā

hai karam us ka ki insan bhi azimushshan hua

warna thi kya baat jo nur-e-KHuda hairan hua

kya kare tarif us ki wo bhi banda-e-KHuda

jis pe ye zi-ruh kya aalam sabhi nazan hua

us ke kun kahne se aalam aur phir kya kya bana

aql-e-insani se be-shak raaz ye pinhan hua

jab hai sari kaenat us ki ibaadat mein magan

to use kya gar jo koi munkir-e-yazdan hua

aazmaish to KHalilullah ki puri hui

baad is ke kaise kaise aadmi qurban hua

han wahan hoga mayassar iKHtiyar

main na jaanun phir mera kyunkar na kam arman hua

zulm insan par musalsal hai kiya kis ne suno

murtakib is jurm ka hae ki bas insan hua

ai bayaban in daraKHshan shahron se thi kya jalan

jo teri surat ki manind shahar ye viran hua

is tarah shayad salamat ta-qayamat tu rahe

ho mubarak ab tera dushman tera darban hua

darja-e-uzma pe faez to yahan insaf hai

be-qusuron wa be-bason ka muntazir zindan hua

yun to hasrat zindagi sari musalman hi raha

waqt-e-aKHir wo magar main sahab-e-iman hua