hai kaThin rah to gir gir ke sambhalna hoga

hai kaThin raah to gir gir ke sambhalnā hogā

apne manzil kī taraf dauḌ ke chalnā hogā

apne ḳhvāboñ ko haqīqat meñ badalne ke liye

ḳhvāb-e-ġhaflat se kisī taur nikalnā hogā

tez āñdhī meñ jalānā hai agar apnā charāġh

ruḳh havāoñ kā ba-har-hāl badalnā hogā

ban ke ulfat kī ghaTā tum yahāñ barsoñ varna

aag nafrat kī jo bhaḌkegī to jalnā hogā

chup rahoge to na mil pā.egā insāf kabhī

us ko paane ke liye tum ko machalnā hogā

zindagī maañg rahī hai jo umañgo kī dalīl

tum ko dariyā kī tarah phir se ubalnā hogā

tum jo chāhe ki ujālā ho tire dam se 'munīb'

ban ke ik sham.a yahāñ tujh ko pighalnā hogā

hai kaThin rah to gir gir ke sambhalna hoga

apne manzil ki taraf dauD ke chalna hoga

apne KHwabon ko haqiqat mein badalne ke liye

KHwab-e-ghaflat se kisi taur nikalna hoga

tez aandhi mein jalana hai agar apna charagh

ruKH hawaon ka ba-har-haal badalna hoga

ban ke ulfat ki ghaTa tum yahan barson warna

aag nafrat ki jo bhaDkegi to jalna hoga

chup rahoge to na mil paega insaf kabhi

us ko pane ke liye tum ko machalna hoga

zindagi mang rahi hai jo umango ki dalil

tum ko dariya ki tarah phir se ubalna hoga

tum jo chahe ki ujala ho tere dam se 'munib'

ban ke ek shama yahan tujh ko pighalna hoga