hai kaun jo batae tumhaara hai ghar kahan

hai kaun jo batā.e tumhārā hai ghar kahāñ

DhūñDegī tum ko shams-o-qamar kī nazar kahāñ

ruknā paḌegā raah meñ ai ham-safar kahāñ

kyā jaane apnī shaam kahāñ aur sahar kahāñ

ai ahl-e-kārvāñ ye tumheñ hai ḳhabar kahāñ

manzil kidhar hai le ke chalā rāhbar kahāñ

parvāna sadqe hone lagā sham.a par magar

me.arāj-e-ishq kyā hai use ye ḳhabar kahāñ

ik saath kah uThe haiñ sabhī bazm-e-nāz meñ

aalam meñ koī aur sahī tū magar kahāñ

ham ko sanam ke husn meñ husn-e-ḳhudā milā

phir ye batāo ham sā koī dīda-var kahāñ

dīvāna kah rahā hai bagūloñ ko dekh kar

phirne lagī bahār chaman chhoḌ kar kahāñ

ham to chaleñge saath zamāne ke umr bhar

chaltā hai apne saath zamāna magar kahāñ

'muḳhlis' havas ko chhoḌ do merā hai mashvara

dekhā hai aap ne ye shajar bārvar kahāñ

hai kaun jo batae tumhaara hai ghar kahan

DhunDegi tum ko shams-o-qamar ki nazar kahan

rukna paDega rah mein ai ham-safar kahan

kya jaane apni sham kahan aur sahar kahan

ai ahl-e-karwan ye tumhein hai KHabar kahan

manzil kidhar hai le ke chala rahbar kahan

parwana sadqe hone laga shama par magar

mearaj-e-ishq kya hai use ye KHabar kahan

ek sath kah uThe hain sabhi bazm-e-naz mein

aalam mein koi aur sahi tu magar kahan

hum ko sanam ke husn mein husn-e-KHuda mila

phir ye batao hum sa koi dida-war kahan

diwana kah raha hai bagulon ko dekh kar

phirne lagi bahaar chaman chhoD kar kahan

hum to chalenge sath zamane ke umr bhar

chalta hai apne sath zamana magar kahan

'muKHlis' hawas ko chhoD do mera hai mashwara

dekha hai aap ne ye shajar barwar kahan