hai KHamoshi-e-intizar bala

hai ḳhamoshī-e-intizār balā

ast hai ek chup hazār balā

dekh le ik nazar ki hai manzūr

sad-tabāhī o sad-hazār balā

dilbarī par hai jāñ-fazā be-dād

dil-dahī par hai jāñ-nisār balā

hijr meñ āsmāñ mudārā.ī

vasl meñ hai satīza-kār balā

kaj-kulāhī kā ham-nashīñ fitna

ḳham-e-gesū kī dost-dār balā

aa ga.ī sar pe āqibat aafat

ho ga.ī chashm-e-intizār balā

hai fidā mujh pe āsmāñ goyā

vaar vaar aa.ī baar baar balā

mujh sā pāmāl-e-rozgār hai kaun

ḳhajil aafat hai sharm-sār balā

daaġh kā mere dard-kash sadma

dard kī mere rāz-dār balā

sehn-e-gulshan kī sham-e-bazm hai barq

naujavānī kī hai bahār balā

ai 'qalaq' āsare kā kyā jiinā

zindagī hai ma.āl-e-kār balā

hai KHamoshi-e-intizar bala

ast hai ek chup hazar bala

dekh le ek nazar ki hai manzur

sad-tabahi o sad-hazar bala

dilbari par hai jaan-faza be-dad

dil-dahi par hai jaan-nisar bala

hijr mein aasman mudarai

wasl mein hai satiza-kar bala

kaj-kulahi ka ham-nashin fitna

KHam-e-gesu ki dost-dar bala

aa gai sar pe aaqibat aafat

ho gai chashm-e-intizar bala

hai fida mujh pe aasman goya

war war aai bar bar bala

mujh sa pamal-e-rozgar hai kaun

KHajil aafat hai sharm-sar bala

dagh ka mere dard-kash sadma

dard ki mere raaz-dar bala

sehn-e-gulshan ki sham-e-bazm hai barq

naujawani ki hai bahaar bala

ai 'qalaq' aasare ka kya jina

zindagi hai maal-e-kar bala