hai KHirad-mandi yahi ba-hosh diwana rahe

hai ḳhirad-mandī yahī bā-hosh dīvāna rahe

hai vahī apnā ki jo apne se begāna rahe

kufr se ye iltijā.eñ kar rahā huuñ baar baar

jā.ūñ to ka.aba magar ruḳh sū-e-mai-ḳhāna rahe

sham-e-sozāñ kuchh ḳhabar bhī hai tujhe o mast-e-ġham

husn-e-mahfil hai jabhī jab tak ki parvāna rahe

zaḳhm-e-dil ai zaḳhm-e-dil nāsūr kyuuñ bantā nahīñ

lutf to jab hai ki afsāne meñ afsāna rahe

ham ko vaa.iz kā bhī dil rakhnā hai saaqī kā bhī dil

ham to tauba kar ke bhī pāband-e-maiḳhāna rahe

āḳhirash kab tak raheñgī husn kī nādāniyāñ

husn se pūchho ki kab tak ishq dīvāna rahe

faiz-e-rāh-e-ishq hai yā faiz-e-jazb-e-ishq hai

ham to manzil pā ke bhī manzil se begāna rahe

mai-kade meñ ham du'ā.eñ kar rahe haiñ baar baar

is taraf bhī chashm-e-mast-e-pīr-e-mai-ḳhāna rahe

aaj to saaqī se ye 'bahzād' ne bāñdhā hai ahd

lab pe tauba ho magar hāthoñ meñ paimāna rahe

hai KHirad-mandi yahi ba-hosh diwana rahe

hai wahi apna ki jo apne se begana rahe

kufr se ye iltijaen kar raha hun bar bar

jaun to kaba magar ruKH su-e-mai-KHana rahe

sham-e-sozan kuchh KHabar bhi hai tujhe o mast-e-gham

husn-e-mahfil hai jabhi jab tak ki parwana rahe

zaKHm-e-dil ai zaKHm-e-dil nasur kyun banta nahin

lutf to jab hai ki afsane mein afsana rahe

hum ko waiz ka bhi dil rakhna hai saqi ka bhi dil

hum to tauba kar ke bhi paband-e-maiKHana rahe

aaKHirash kab tak rahengi husn ki nadaniyan

husn se puchho ki kab tak ishq diwana rahe

faiz-e-rah-e-ishq hai ya faiz-e-jazb-e-ishq hai

hum to manzil pa ke bhi manzil se begana rahe

mai-kade mein hum du'aen kar rahe hain bar bar

is taraf bhi chashm-e-mast-e-pir-e-mai-KHana rahe

aaj to saqi se ye 'bahzad' ne bandha hai ahd

lab pe tauba ho magar hathon mein paimana rahe