hai KHud se KHush-gumani to kisi ka imtihan kyon ho

hai ḳhud se ḳhush-gumānī to kisī kā imtihāñ kyoñ ho

jahāñ meñ koī bhī 'maḳhfī' kisī se bad-gumāñ kyoñ ho

nazar ko shauq baḳhshā to sarāpā aañkh ho jā.ūñ

kasāfat kī koī chādar hijāb-e-darmiyāñ kyoñ ho

nahīñ jis kā makāñ us kī mohabbat meñ jo uḌtā ho

kahīñ bhī mudda.ā us kā sukūn-e-āshiyāñ kyoñ ho

vafā-e-haq kī aadat yuuñ ho jaise saañs lete ho

razā kī raah ke raahī kā koī rāz-dāñ kyoñ ho

irāde ko qad-āvar kar balā.eñ muñh chhupā.eñgī

rahe phir dhuup kaisī hī to koī sā.ebāñ kyoñ ho

rag-e-jāñ se qarīb us ko karo mahsūs 'maḳhfī' to

kahīñ bhī kyoñ nahīñ miltā ḳhudā to hai kahāñ kyoñ ho

hai KHud se KHush-gumani to kisi ka imtihan kyon ho

jahan mein koi bhi 'maKHfi' kisi se bad-guman kyon ho

nazar ko shauq baKHsha to sarapa aankh ho jaun

kasafat ki koi chadar hijab-e-darmiyan kyon ho

nahin jis ka makan us ki mohabbat mein jo uDta ho

kahin bhi muddaa us ka sukun-e-ashiyan kyon ho

wafa-e-haq ki aadat yun ho jaise sans lete ho

raza ki rah ke rahi ka koi raaz-dan kyon ho

irade ko qad-awar kar balaen munh chhupaengi

rahe phir dhup kaisi hi to koi saeban kyon ho

rag-e-jaan se qarib us ko karo mahsus 'maKHfi' to

kahin bhi kyon nahin milta KHuda to hai kahan kyon ho