hai kitni KHud-gharaz makkar duniya humne dekha hai

hai kitnī ḳhud-ġharaz makkār duniyā ham ne dekhā hai

ḳhud apnī hī tabāhī kā tamāsha ham ne dekhā hai

hamāre ghar jale haiñ ḳhud hamāre hī charāġhoñ se

khulī āñkhoñ se apnoñ kā irāda ham ne dekhā hai

ye sajda-rez tak hotī hai duniyā jabr ke aage

kahīñ Dar se bajā laatī hai mujrā ham ne dekhā hai

qayāmat-ḳhez tūfānoñ meñ barsātī havāoñ meñ

ubharte Dūbte dil kā jazīra ham ne dekhā hai

tasallī dene vaale ḳhud maza lete haiñ hañs hañs kar

pas-e-ehsān-o-hamdardī dikhāvā ham ne dekhā hai

saf-e-mātam kī tayyārī kahīñ shahnā.iyāñ sargarm

dikhātī hai ye duniyā rang kyā kyā ham ne dekhā hai

huā kyā is se hāsil mai-kade vaalo batā denā

jo girne aur sambhalne kā tamāshā ham ne dekhā hai

ḳhulūs-e-dil se saarī sarhadeñ mil jaatī haiñ 'najmī'

jahāñ milte haiñ sab raste vo rasta ham ne dekhā hai

hai kitni KHud-gharaz makkar duniya hum ne dekha hai

KHud apni hi tabahi ka tamasha hum ne dekha hai

hamare ghar jale hain KHud hamare hi charaghon se

khuli aankhon se apnon ka irada hum ne dekha hai

ye sajda-rez tak hoti hai duniya jabr ke aage

kahin Dar se baja lati hai mujra hum ne dekha hai

qayamat-KHez tufanon mein barsati hawaon mein

ubharte Dubte dil ka jazira hum ne dekha hai

tasalli dene wale KHud maza lete hain hans hans kar

pas-e-ehsan-o-hamdardi dikhawa hum ne dekha hai

saf-e-matam ki tayyari kahin shahnaiyan sargarm

dikhati hai ye duniya rang kya kya hum ne dekha hai

hua kya is se hasil mai-kade walo bata dena

jo girne aur sambhalne ka tamasha hum ne dekha hai

KHulus-e-dil se sari sarhaden mil jati hain 'najmi'

jahan milte hain sab raste wo rasta hum ne dekha hai