ہے کوئی مے کش نہ بادہ ہے نہ پیمانے کا نام

ہے کوئی مے کش نہ بادہ ہے نہ پیمانے کا نام

مفت میں بدنام کر رکھا ہے میخانے کا نام

دوسرا کیا اور ہوتا ایسے ویرانے کا نام

دشت وحشت ہے مناسب میرے کاشانے کا نام

غم ہے میری زندگی غم ناک میری زندگی

اس لئے زندان غم ہے میرے ویرانے کا نام

بت گئے دل سے مگر یاد بتاں تو دل میں ہے

ساتھ کعبے کے چلا جاتا ہے بت خانے کا نام

باد صرصر لے اڑی جو چار تنکے تھے بچے

مٹ گیا گلشن سے آخر میرے کاشانے کا نام

یاد کرتا ہے زمانہ اب بھی دشت نجد کو

قیس کا قصہ لئے پھرتا ہے ویرانے کا نام

ساقیٔ بدمست کا طرز نظر ہے بادہ ریز

اب کہاں چلتا ہے میخانے میں پیمانے کا نام

اہل عرفاں کے لئے ہوتا ہے یہ سامان وجد

جھومتے رہتے ہیں لے کر تیرے دیوانے کا نام

جاں ستانی چھوڑ ظالم جاں نثاری کر شعار

آج شاہیں سے کہیں بڑھ کر پروانے کا نام

ہوتے ہوتے ہو گئی دیوانگی فرزانگی

ہو گیا ہر پھر کے دیوانہ ہی فرزانے کا نام

مجھ پر اس مے خانۂ قدرت کا خوشترؔ ہے کرم

لیتے ہیں تسنیم و کوثر جس کے پیمانے کا نام