hai koi mai-kash na baada hai na paimane ka nam

hai koī mai-kash na baada hai na paimāne kā naam

muft meñ badnām kar rakkhā hai maiḳhāne kā naam

dūsrā kyā aur hotā aise vīrāne kā naam

dasht-e-vahshat hai munāsib mere kāshāne kā naam

ġham hai merī zindagī ġhamnāk merī zindagī

is liye zindān-e-ġham hai mere vīrāne kā naam

but ga.e dil se magar yād-e-butāñ to dil meñ hai

saath ka.abe ke chalā jaatā hai but-ḳhāne kā naam

bād-e-sarsar le uḌī jo chaar tinke the bache

miT gayā gulshan se āḳhir mere kāshāne kā naam

yaad kartā hai zamāna ab bhī dasht-e-najd ko

qais kā qissa liye phirtā hai vīrāne kā naam

sāqī-e-badmast kā tarz-e-nazar hai bāda-rez

ab kahāñ chaltā hai maiḳhāne meñ paimāne kā naam

ahl-e-irfāñ ke liye hotā hai ye sāmān-e-vajd

jhūmte rahte haiñ le kar tere dīvāne kā naam

jāñ-sitānī chhoḌ zālim jāñ-nisārī kar shi.ār

aaj shāhīñ se kahīñ baḌh kar parvāne kā naam

hote hote ho ga.ī dīvāngī farzāngī

ho gayā hir-phir ke dīvāna hī farzāne kā naam

mujh par us mai-ḳhāna-e-qudrat kā 'ḳhushtar' hai karam

lete haiñ tasnīm-o-kausar jis ke paimāne kā naam

hai koi mai-kash na baada hai na paimane ka nam

muft mein badnam kar rakkha hai maiKHane ka nam

dusra kya aur hota aise virane ka nam

dasht-e-wahshat hai munasib mere kashane ka nam

gham hai meri zindagi ghamnak meri zindagi

is liye zindan-e-gham hai mere virane ka nam

but gae dil se magar yaad-e-butan to dil mein hai

sath kabe ke chala jata hai but-KHane ka nam

baad-e-sarsar le uDi jo chaar tinke the bache

miT gaya gulshan se aaKHir mere kashane ka nam

yaad karta hai zamana ab bhi dasht-e-najd ko

qais ka qissa liye phirta hai virane ka nam

saqi-e-badmast ka tarz-e-nazar hai baada-rez

ab kahan chalta hai maiKHane mein paimane ka nam

ahl-e-irfan ke liye hota hai ye saman-e-wajd

jhumte rahte hain le kar tere diwane ka nam

jaan-sitani chhoD zalim jaan-nisari kar shiar

aaj shahin se kahin baDh kar parwane ka nam

hote hote ho gai diwangi farzangi

ho gaya hir-phir ke diwana hi farzane ka nam

mujh par us mai-KHana-e-qudrat ka 'KHushtar' hai karam

lete hain tasnim-o-kausar jis ke paimane ka nam