ہے کوئی مطرب نہ کوئی ساز ہے

ہے کوئی مطرب نہ کوئی ساز ہے

بس مرا نغمہ مری آواز ہے

آدمی کا کب کوئی ہم راز ہے

میرا اپنا تو یہی انداز ہے

جا ہی پہنچوں گا کبھی منزل پہ میں

جذبۂ الفت پر پرواز ہے

زندگی کو جانتا ہوں زندگی

یہ غم دل دار کا اعجاز ہے

غم زدہ دل رہ گیا ہے اور میں

اب نہ وہ غمزے نہ وہ غماز ہے

زندگی کیا زندگی کا دوست کیا

ایک دشمن دوسرا دم باز ہے

ہے شکست و ریخت سامان جنوں

عقل خود بیں مفسدہ پرداز ہے

رہنے دے اللہ والے ہیں کہاں

تو بھی اے واعظ زمانہ ساز ہے

خوشترؔ ان کا بندۂ ناچیز بن

یہ بھی تو اک صورت اعجاز ہے