hai kuchh agar saliqa hai kuchh agar qarina

hai kuchh agar salīqa hai kuchh agar qarīnā

marne kī tarah marnā jiine kī tarah jiinā

kartā huuñ paar dariyā tūfān kī madad se

merī nigāh meñ hai har mauj ik safīnā

is meñ bhī raushnī hai us meñ bhī raushnī thī

merā bhī hai vo siina muusā kā thā jo siina

jis samt sar jhukā.ūñ gulshan 'araq 'araq ho

mahke mirī jabīñ se har phuul kā pasīnā

parhez kis liye phir jab raa.e hai ye sab kī

jaa.ez hai ai 'munavvar' tum ko sharāb piinā

hai kuchh agar saliqa hai kuchh agar qarina

marne ki tarah marna jine ki tarah jina

karta hun par dariya tufan ki madad se

meri nigah mein hai har mauj ek safina

is mein bhi raushni hai us mein bhi raushni thi

mera bhi hai wo sina musa ka tha jo sina

jis samt sar jhukaun gulshan 'araq 'araq ho

mahke meri jabin se har phul ka pasina

parhez kis liye phir jab rae hai ye sab ki

jaez hai ai 'munawwar' tum ko sharab pina