ہے کشادہ زمیں نکل جائیں

ہے کشادہ زمیں نکل جائیں

خود کو ڈھونڈیں کہیں نکل جائیں

یا تو سینے سے دل نکل جائے

یا تو دل سے حسیں نکل جائیں

اک گزارش ہے مہربانوں سے

چھوڑ دیں آستیں نکل جائیں

ہاں دوانوں کے آستانے سے

سب ذہین و فطیں نکل جائیں

یا تو دل دھو کے آئیں کعبے میں

یا تو سب زائریں نکل جائیں

ہم مری جان آپ کے دل سے

اتنا آساں نہیں نکل جائیں

بوڑھے والد سے نوجواں بیٹا

کہہ رہا تھا کہیں نکل جائیں

تیری آنکھوں کے فیضؔ موتی ہیں

ہم کہ آنسو نہیں نکل جائیں