hai kya sang-e-dar-e-jaanan usi ka dil samajhta hai

hai kyā sang-e-dar-e-jānāñ usī kā dil samajhtā hai

jo dīvāna tirī chaukhaT ko mustaqbil samajhtā hai

taqāze par muravvat ke zarā sar kyā jhukāyā thā

usī din se mirā dushman mujhe buzdil samajhtā hai

ye saḌkoñ par jo dīvāna divāna-vār phirtā hai

koī pāgal samajhtā hai koī kāmil samajhtā hai

ḳhushī chipkā ke hoñToñ par nayā chehra banātā huuñ

maiñ kaise aatā jaatā huuñ sar-e-mahfil samajhtā hai

sar-e-maqtal ye kaTne ko jhukegī to anā ke saath

mirī gardan kī ḳhūbī ko mirā qātil samajhtā hai

saḳhāvat to mashiyyat pe hī mabnī hai saḳhī kī par

ġham-e-inkār kyā hai ye dil-e-sā.il samajhtā hai

yahāñ insāf honā ġhair-mumkin hai miyāñ 'dānish'

ye munsif haq-bayānī ko zarā mushkil samajhtā hai

hai kya sang-e-dar-e-jaanan usi ka dil samajhta hai

jo diwana teri chaukhaT ko mustaqbil samajhta hai

taqaze par murawwat ke zara sar kya jhukaya tha

usi din se mera dushman mujhe buzdil samajhta hai

ye saDkon par jo diwana diwana-war phirta hai

koi pagal samajhta hai koi kaamil samajhta hai

KHushi chipka ke honTon par naya chehra banata hun

main kaise aata jata hun sar-e-mahfil samajhta hai

sar-e-maqtal ye kaTne ko jhukegi to ana ke sath

meri gardan ki KHubi ko mera qatil samajhta hai

saKHawat to mashiyyat pe hi mabni hai saKHi ki par

gham-e-inkar kya hai ye dil-e-sail samajhta hai

yahan insaf hona ghair-mumkin hai miyan 'danish'

ye munsif haq-bayani ko zara mushkil samajhta hai