hai kyun naql-e-makani ye hawa-e-taza-tar kya hai

hai kyuuñ naql-e-makānī ye havā-e-tāza-tar kyā hai

samajh meñ kuchh nahīñ aatā idhar kyā hai udhar kyā hai

numūd-e-ibtidā kyā intihā kyā hai bashar kyā hai

ye kār-e-naqsh-gar kyuuñ hai ye hairat kā safar kyā hai

razā us kī to phir chubhtā huā ye neshtar kyā hai

badan kyuuñ hai hisār-e-ḳhauf meñ āñkhoñ meñ Dar kyā hai

jo sach pūchho ye tasvīreñ kisī ik kaifiyat kī haiñ

ḳharosh-e-naġhma-zan kyuuñ hai sadā-e-nauha-gar kyā hai

na honā bhī hai honā be-makānī lā-makānī hai

sar-e-kohsār yā farsh-e-zamīñ par huuñ ḳhabar kyā hai

nahīñ bujhtī shikam kī aag kār-e-be-sukūnī meñ

sarīr-o-tāj-o-kishvar kyā manāl-o-māl-o-zar kyā hai

jise nā-ḳhūb kahte haiñ usī ko ḳhuub kahte haiñ

tamīz-e-ḳhair-o-shar meñ nukta-e-sad-motabar kyā hai

parī-timsāl haiñ sub.heñ garībāñ-chāk haiñ shāmeñ

talattuf hai ki mahshar jaane tāsīr-e-nazar kyā hai

faqat ik lams jism-o-rūh ko shādāb rakhtā hai

hunar-mandoñ se pūchho qand-lab meñ ye hunar kyā hai

harī thiiñ khetiyāñ murjhā ga.iiñ bād-e-bahārī se

na jaane phuul se chehre kā mausam par asar kyā hai

dam-e-nazzāra us ne chupke chupke khol diiñ zulfeñ

mirā ye pūchhnā hī thā ki nāz-e-bahr-o-bar kyā hai

'amīn-ashraf' vo rahtā hai kahīñ is shahr meñ lekin

mile koī to pūchhūñ sūrat-e-dīvār-o-dar kyā hai

hai kyun naql-e-makani ye hawa-e-taza-tar kya hai

samajh mein kuchh nahin aata idhar kya hai udhar kya hai

numud-e-ibtida kya intiha kya hai bashar kya hai

ye kar-e-naqsh-gar kyun hai ye hairat ka safar kya hai

raza us ki to phir chubhta hua ye neshtar kya hai

badan kyun hai hisar-e-KHauf mein aankhon mein Dar kya hai

jo sach puchho ye taswiren kisi ek kaifiyat ki hain

KHarosh-e-naghma-zan kyun hai sada-e-nauha-gar kya hai

na hona bhi hai hona be-makani la-makani hai

sar-e-kohsar ya farsh-e-zamin par hun KHabar kya hai

nahin bujhti shikam ki aag kar-e-be-sukuni mein

sarir-o-taj-o-kishwar kya manal-o-mal-o-zar kya hai

jise na-KHub kahte hain usi ko KHub kahte hain

tamiz-e-KHair-o-shar mein nukta-e-sad-motabar kya hai

pari-timsal hain subhen gariban-chaak hain shamen

talattuf hai ki mahshar jaane tasir-e-nazar kya hai

faqat ek lams jism-o-ruh ko shadab rakhta hai

hunar-mandon se puchho qand-lab mein ye hunar kya hai

hari thin khetiyan murjha gain baad-e-bahaari se

na jaane phul se chehre ka mausam par asar kya hai

dam-e-nazzara us ne chupke chupke khol din zulfen

mera ye puchhna hi tha ki naz-e-bahr-o-bar kya hai

'amin-ashraf' wo rahta hai kahin is shahr mein lekin

mile koi to puchhun surat-e-diwar-o-dar kya hai