hai mazaq-e-zinda-dili yahi isi maslahat ne maza diya

hai mazāq-e-zinda-dilī yahī isī maslahat ne mazā diyā

na judā ho dil se kasak kabhī vo mizāj-e-dard banā diyā

maiñ abhī kahāñ thā dil-e-hazīñ jo khulī hai aañkh to kuchh nahīñ

mirā farsh-e-ḳhāk to hai vahīñ mujhe arsh-e-ḳhvāb ne kyā diyā

koī haq thā jis kā gila karūñ koī tum se kahne kī baat hai

ki hañsī ḳhushī ke sulūk kā jo rivāj thā vo uThā diyā

mire dard-e-dil kī kise ḳhabar ki ġharīb-e-dil kā payāmbar

vahī rang-e-ruḳh thā kisī qadar jo hañsī meñ sab ne uḌā diyā

hai muġhālta bhī ajiib shai vo na yaad aa.egā tā-ba-ke

jo chhupā ke apne hī zehn meñ ye samajh liyā ki bhulā diyā

rah-o-rasm-e-ishq kī manzileñ vo nazākateñ vo latāfateñ

kabhī lutf āfat-e-jāñ banā kabhī jhiḌkiyoñ ne mazā diyā

vo talavvun-e-dam-e-hosh thā kabhī kuchh bane kabhī kuchh bane

ye junūn-e-ishq kī shaan hai jo banā diyā so banā diyā

ye charāg merī umiid kā ye ghaḌī ghaḌī tirā mashġhala

kabhī duur hī se jalā diyā kabhī paas aa ke bujhā diyā

jo nazar milī to ye soch thā ki savāl aap se kyā karūñ

jo kiyā savāl to soch hai ki javāb aap ne kyā diyā

hai 'razā' ye hasb-e-maqām-e-dil ki payām-e-dil ho ba-nām-e-dil

koī qadr-dān-e-kalām-e-dil kahīñ mil gayā to sunā diyā

hai mazaq-e-zinda-dili yahi isi maslahat ne maza diya

na juda ho dil se kasak kabhi wo mizaj-e-dard bana diya

main abhi kahan tha dil-e-hazin jo khuli hai aankh to kuchh nahin

mera farsh-e-KHak to hai wahin mujhe arsh-e-KHwab ne kya diya

koi haq tha jis ka gila karun koi tum se kahne ki baat hai

ki hansi KHushi ke suluk ka jo riwaj tha wo uTha diya

mere dard-e-dil ki kise KHabar ki gharib-e-dil ka payambar

wahi rang-e-ruKH tha kisi qadar jo hansi mein sab ne uDa diya

hai mughaalta bhi ajib shai wo na yaad aaega ta-ba-ke

jo chhupa ke apne hi zehn mein ye samajh liya ki bhula diya

rah-o-rasm-e-ishq ki manzilen wo nazakaten wo latafaten

kabhi lutf aafat-e-jaan bana kabhi jhiDkiyon ne maza diya

wo talawwun-e-dam-e-hosh tha kabhi kuchh bane kabhi kuchh bane

ye junun-e-ishq ki shan hai jo bana diya so bana diya

ye charag meri umid ka ye ghaDi ghaDi tera mashghala

kabhi dur hi se jala diya kabhi pas aa ke bujha diya

jo nazar mili to ye soch tha ki sawal aap se kya karun

jo kiya sawal to soch hai ki jawab aap ne kya diya

hai 'raza' ye hasb-e-maqam-e-dil ki payam-e-dil ho ba-nam-e-dil

koi qadr-dan-e-kalam-e-dil kahin mil gaya to suna diya