hai mere samne mere liye dil-gir koi

hai mire sāmne mere liye dil-gīr koī

shāyad ab husn ke tarkash meñ nahīñ tiir koī

jazba-e-shauq kī dekhe mire tāsīr koī

ban ke aaya hai mire sher kī tafsīr koī

jurm-e-ulfat kī sazā dār-o-rasan tak mahdūd

aur kuchh is se sivā chāhiye tāzīr koī

aa.ina ban ke tirī bazm meñ sab kuchh dekhā

aur ḳhāmosh rahā sūrat-e-tasvīr koī

merī vahshat se hai zindāñ meñ jo ik hashr bapā

aa ke thoḌī sī ghaTā de mirī zanjīr koī

ek hī baat pe chehroñ ke badal jaane se

qābil-e-dād koī lā.eq-e-tāzīr koī

haiñ mirī nok-e-mizha par bhī nigāheñ sab kī

aañkh kā apnī nahīñ dekhtā shahtīr koī

'zabt' vo nudrat-e-guftār milī hai mujh ko

shauq se suntā hai aksar mirī taqrīr koī

hai mere samne mere liye dil-gir koi

shayad ab husn ke tarkash mein nahin tir koi

jazba-e-shauq ki dekhe mere tasir koi

ban ke aaya hai mere sher ki tafsir koi

jurm-e-ulfat ki saza dar-o-rasan tak mahdud

aur kuchh is se siwa chahiye tazir koi

aaina ban ke teri bazm mein sab kuchh dekha

aur KHamosh raha surat-e-taswir koi

meri wahshat se hai zindan mein jo ek hashr bapa

aa ke thoDi si ghaTa de meri zanjir koi

ek hi baat pe chehron ke badal jaane se

qabil-e-dad koi laeq-e-tazir koi

hain meri nok-e-mizha par bhi nigahen sab ki

aankh ka apni nahin dekhta shahtir koi

'zabt' wo nudrat-e-guftar mili hai mujh ko

shauq se sunta hai aksar meri taqrir koi