hai nur-e-KHuda bhi yahan irfan-e-KHuda bhi

hai nūr-e-ḳhudā bhī yahāñ irfān-e-ḳhudā bhī

ye zaat ki hai vādī-e-sīnā bhī hirā bhī

us ban meñ kiyā kartī hai tap merī anā bhī

is shahr meñ hai kār-gah-e-arz-o-samā bhī

kartā huuñ tavāf apnā to miltī hai na.ī raah

qibla bhī hai ye zaat mirā qibla-numā bhī

ḳhud-āgahī o ḳhud-nigahī kā hai ye in.aam

aur jurm-e-shanāsā.ī-e-ālam kī sazā bhī

hotā hai shab-o-roz tamāshā sar-e-ehsās

jo dekhtī rahtī hai mirī aañkh dikhā bhī

kartī hai kamar-basta safar par bhī yahī zaat

jab duur nikal jaatā huuñ detī hai sadā bhī

zarre meñ hai kaunain to kaunain meñ zarra

kuchh hai tujhe āvāra-e-aflāk patā bhī

hai nur-e-KHuda bhi yahan irfan-e-KHuda bhi

ye zat ki hai wadi-e-sina bhi hira bhi

us ban mein kiya karti hai tap meri ana bhi

is shahr mein hai kar-gah-e-arz-o-sama bhi

karta hun tawaf apna to milti hai nai rah

qibla bhi hai ye zat mera qibla-numa bhi

KHud-agahi o KHud-nigahi ka hai ye inam

aur jurm-e-shanasai-e-alam ki saza bhi

hota hai shab-o-roz tamasha sar-e-ehsas

jo dekhti rahti hai meri aankh dikha bhi

karti hai kamar-basta safar par bhi yahi zat

jab dur nikal jata hun deti hai sada bhi

zarre mein hai kaunain to kaunain mein zarra

kuchh hai tujhe aawara-e-aflak pata bhi