ہے پشیماں چاند اس کا روئے تاباں دیکھ کر

ہے پشیماں چاند اس کا روئے تاباں دیکھ کر

شب کھلی ہے میرے دلبر کو درخشاں دیکھ کر

عشق تو ہے عیب مجھ میں تو ہنر ہے حسن کا

ہے جوانی دنگ ہم دونو کو یکساں دیکھ کر

یہ جہاں لایا گیا ہے سازشاً میرے لیے

میں مگر ہنستا ہوں غم کا اتنا ساماں دیکھ کر

چاہتا ہوں بات کرنا اس سے دنیا بھر کی میں

ڈر رہا ہوں اس کے لیکن لفظ پیکاں دیکھ کر

جانتا عجلت ہے ان کو بات کہہ دیتا تبھی

اب فراغت سے ہیں وہ مجھ کو پشیماں دیکھ کر

لطف تنہائی نے ہم کو اتنا دانا کر دیا

اب لرز اٹھتا ہے دل مہمان ناداں دیکھ کر