hai phaili chaar-su ye tirgi kya

hai phailī chār-sū ye tīrgī kyā

jo shama-e-ārzū thī bujh ga.ī kyā

banānā aur banā kar toḌ denā

junūñ-añgez hai shīshagarī kyā

maiñ apnā aap dushman ho gayā huuñ

karegā ab koī chāragarī kyā

ḳhafā mujh se jo merī zindagī hai

ajal ko bhī hai kam nārāzgī kyā

na jaane aaj kyoñ luTne kā ġham hai

koī daulat hamāre paas thī kyā

guloñ tak aa hī pahuñchā dast-e-gul-chīñ

chaman kī aabrū baaqī rahī kyā

patā jis ko milā terā vo ġham hai

kamāl-e-āgahī hai be-ḳhudī kyā

yahāñ to aag sī dil meñ lagī hai

lagī dil kī hai koī dil-lagī kyā

takabbur se kisī ko kyā milā hai

habāb-e-bahr kī dariyā-dilī kyā

na raas aa.egī 'manzar' sher-goī

ki tum kyā aur tumhārī shā.erī kyā

hai phaili chaar-su ye tirgi kya

jo shama-e-arzu thi bujh gai kya

banana aur bana kar toD dena

junun-angez hai shishagari kya

main apna aap dushman ho gaya hun

karega ab koi chaaragari kya

KHafa mujh se jo meri zindagi hai

ajal ko bhi hai kam naraazgi kya

na jaane aaj kyon luTne ka gham hai

koi daulat hamare pas thi kya

gulon tak aa hi pahuncha dast-e-gul-chin

chaman ki aabru baqi rahi kya

pata jis ko mila tera wo gham hai

kamal-e-agahi hai be-KHudi kya

yahan to aag si dil mein lagi hai

lagi dil ki hai koi dil-lagi kya

takabbur se kisi ko kya mila hai

habab-e-bahr ki dariya-dili kya

na ras aaegi 'manzar' sher-goi

ki tum kya aur tumhaari shaeri kya