ہے پھیلی چار سو یہ تیرگی کیا

ہے پھیلی چار سو یہ تیرگی کیا

جو شمع آرزو تھی بجھ گئی کیا

بنانا اور بنا کر توڑ دینا

جنوں انگیز ہے شیشہ گری کیا

میں اپنا آپ دشمن ہو گیا ہوں

کرے گا اب کوئی چارہ گری کیا

خفا مجھ سے جو میری زندگی ہے

اجل کو بھی ہے کم ناراضگی کیا

نہ جانے آج کیوں لٹنے کا غم ہے

کوئی دولت ہمارے پاس تھی کیا

گلوں تک آ ہی پہنچا دست گلچیں

چمن کی آبرو باقی رہی کیا

پتا جس کو ملا تیرا وہ غم ہے

کمال آگہی ہے بے خودی کیا

یہاں تو آگ سی دل میں لگی ہے

لگی دل کی ہے کوئی دل لگی کیا

تکبر سے کسی کو کیا ملا ہے

حباب بحر کی دریا دلی کیا

نہ راس آئے گی منظرؔ شعر گوئی

کہ تم کیا اور تمہاری شاعری کیا