hai samundar samne pyase bhi hain pani bhi hai

hai samundar sāmne pyāse bhī haiñ paanī bhī hai

tishnagī kaise bujhā.eñ ye pareshānī bhī hai

ham musāfir haiñ sulagtī dhuup jaltī raah ke

vo tumhārā rāsta hai jis meñ āsānī bhī hai

maiñ to dil se us kī dānā.ī kā qaa.el ho gayā

dostoñ kī saf meñ hai aur dushman-e-jānī bhī hai

paḌh na paao tum to ye kis kī ḳhatā hai dosto

varna chehra mus.haf-e-āmāl-e-insānī bhī hai

zindagī unvān jis qisse kī hai vo aaj bhī

muḳhtasar se muḳhtasar hai aur tūlānī bhī hai

ratjage jo bāñTtā phirtā hai saare shahr meñ

vo fasīl-e-ḳhvāb meñ barsoñ se zindānī bhī hai

be-tahāsha vo to miltā hai mohabbat se magar

kuchh pareshānī bhī hai aur ḳhanda-peshānī bhī hai

apnā ham-sāya hai lekin fāsla barsoñ kā hai

aisī qurbat itnī duurī jis meñ hairānī bhī hai

zindagī bhar ham sarāboñ kī taraf chalte rahe

ab jahāñ thak kar gire haiñ us jagah paanī bhī hai

'ramz' terī tīra-baḳhtī kī ye shab kaT jā.egī

raat ke dāman meñ koī chiiz nūrānī bhī hai

hai samundar samne pyase bhi hain pani bhi hai

tishnagi kaise bujhaen ye pareshani bhi hai

hum musafir hain sulagti dhup jalti rah ke

wo tumhaara rasta hai jis mein aasani bhi hai

main to dil se us ki danai ka qael ho gaya

doston ki saf mein hai aur dushman-e-jaani bhi hai

paDh na pao tum to ye kis ki KHata hai dosto

warna chehra mushaf-e-amal-e-insani bhi hai

zindagi unwan jis qisse ki hai wo aaj bhi

muKHtasar se muKHtasar hai aur tulani bhi hai

ratjage jo banTta phirta hai sare shahr mein

wo fasil-e-KHwab mein barson se zindani bhi hai

be-tahasha wo to milta hai mohabbat se magar

kuchh pareshani bhi hai aur KHanda-peshani bhi hai

apna ham-saya hai lekin fasla barson ka hai

aisi qurbat itni duri jis mein hairani bhi hai

zindagi bhar hum sarabon ki taraf chalte rahe

ab jahan thak kar gire hain us jagah pani bhi hai

'ramz' teri tira-baKHti ki ye shab kaT jaegi

raat ke daman mein koi chiz nurani bhi hai