hai shart qimat-e-hunar bhi ab to rabt-e-KHas par

hai shart qīmat-e-hunar bhī ab to rabt-e-ḳhās par

milegā sañg-e-dād bhī havā ke ruḳh ko dekh kar

kabhī havā kā ajr hai kabhī rutoñ kā hai hunar

kahāñ huā hai aaj tak parind koī mo'tabar

kanār-e-āb ḳhūñ-chakāñ jabīñ to ḳhaak ho chukī

ye kis kā 'aks pāniyoñ meñ phir uThā rahā hai sar

hazār meñ asiir huuñ tire tilism-e-nutq kī

ye qufl-e-dil kahāñ khulā kalīd-e-harf se magar

havā kā rizq ho chuke ujāle merī raah ke

ki ab ke phir siyāhiyoñ kī samt uTh ga.ī nazar

vo jā.egā to is ke baa'd dukh hī ghar meñ aa.egā

na jaane kis umiid par saje hue haiñ bām-o-dar

hai shart qimat-e-hunar bhi ab to rabt-e-KHas par

milega sang-e-dad bhi hawa ke ruKH ko dekh kar

kabhi hawa ka ajr hai kabhi ruton ka hai hunar

kahan hua hai aaj tak parind koi mo'tabar

kanar-e-ab KHun-chakan jabin to KHak ho chuki

ye kis ka 'aks paniyon mein phir uTha raha hai sar

hazar mein asir hun tere tilism-e-nutq ki

ye qufl-e-dil kahan khula kalid-e-harf se magar

hawa ka rizq ho chuke ujale meri rah ke

ki ab ke phir siyahiyon ki samt uTh gai nazar

wo jaega to is ke ba'd dukh hi ghar mein aaega

na jaane kis umid par saje hue hain baam-o-dar