hai soz-e-gham ko garmi-e-bazar ki talash

hai soz-e-ġham ko garmī-e-bāzār kī talāsh

is jins ko hai apne ḳharīdār kī talāsh

kāfir kī justujū hai na dīñ-dār kī talāsh

hai ek jazb-e-ġham ke parastār kī talāsh

āvārgī-e-chashm-e-tajassus 'abas nahīñ

kartī hai apne markaz-e-dīdār kī talāsh

juuyā gunāhgār hai lutf-e-karīm kā

lutf-e-karīm ko hai gunahgār kī talāsh

kyā jaane shāḳh shāḳh ne kyā gul khilā.e haiñ

hai āshiyāñ ko barq-e-sharar-bār kī talāsh

vārafta-e-junūn kā hai mudda'ā kuchh aur

sahrā kī justujū hai na gulzār kī talāsh

pursāñ koī bhī aaj 'munavvar' mirā nahīñ

mujh ġham-zada ko hai kisī ġham-ḳhvār kī talāsh

hai soz-e-gham ko garmi-e-bazar ki talash

is jins ko hai apne KHaridar ki talash

kafir ki justuju hai na din-dar ki talash

hai ek jazb-e-gham ke parastar ki talash

aawargi-e-chashm-e-tajassus 'abas nahin

karti hai apne markaz-e-didar ki talash

juya gunahgar hai lutf-e-karim ka

lutf-e-karim ko hai gunahgar ki talash

kya jaane shaKH shaKH ne kya gul khilae hain

hai aashiyan ko barq-e-sharar-bar ki talash

warafta-e-junun ka hai mudda'a kuchh aur

sahra ki justuju hai na gulzar ki talash

pursan koi bhi aaj 'munawwar' mera nahin

mujh gham-zada ko hai kisi gham-KHwar ki talash