hai suni suni har ek rahguzar aaKHir-e-shab

hai suunī suunī har ik rahguzār āḳhir-e-shab

koī kisī kā nahīñ ġham-gusār āḳhir-e-shab

sajī huī jo sitāroñ kī anjuman dekhī

vo yaad aa.e haiñ be-iḳhtiyār āḳhir-e-shab

hai merī hamdam-o-dam-sāz merī tanhā.ī

nafas nafas hai mirā rāzdār āḳhir-e-shab

na jaane baiThā huuñ kab se junūñ ke 'ālam meñ

mujhe kisī kā nahīñ intizār āḳhir-e-shab

chalī hai daf'atan ehsās kī vo purvā.ī

har ek lamha huā dil pe baar āḳhir-e-shab

mire sivā yahāñ koī nahīñ magar phir bhī

bhaTak rahā huuñ maiñ dīvāna-vār āḳhir-e-shab

bisāt-e-zehn pe kis kis ke naam ubhar aa.e

maiñ kar rahā thā ġhamoñ kā shumār āḳhir-e-shab

fazā meñ chhā.ī hai 'ahmad' 'ajab sī betābi

sabā hai kis ke liye be-qarār āḳhir-e-shab

hai suni suni har ek rahguzar aaKHir-e-shab

koi kisi ka nahin gham-gusar aaKHir-e-shab

saji hui jo sitaron ki anjuman dekhi

wo yaad aae hain be-iKHtiyar aaKHir-e-shab

hai meri hamdam-o-dam-saz meri tanhai

nafas nafas hai mera raazdar aaKHir-e-shab

na jaane baiTha hun kab se junun ke 'alam mein

mujhe kisi ka nahin intizar aaKHir-e-shab

chali hai daf'atan ehsas ki wo purwai

har ek lamha hua dil pe bar aaKHir-e-shab

mere siwa yahan koi nahin magar phir bhi

bhaTak raha hun main diwana-war aaKHir-e-shab

bisat-e-zehn pe kis kis ke nam ubhar aae

main kar raha tha ghamon ka shumar aaKHir-e-shab

faza mein chhai hai 'ahmad' 'ajab si betabi

saba hai kis ke liye be-qarar aaKHir-e-shab