hai tariqa koi KHwab-e-wasl ki tabir ka

hai tarīqa koī ḳhvāb-e-vasl kī ta.abīr kā

mere us ke darmiyāñ parda hai ik tasvīr kā

zikr terā tark karnā hai mire ġham kī davā

muntazir huuñ is mujarrab nusḳhe kī tāsīr kā

yaad meñ terī taḌap kar hāl-e-dil karnā raqam

murtakib hotā huuñ maiñ har shab isī taqsīr kā

zaḳhm-e-dil ko Dhāñkne kā ik vasīla thā suḳhan

phir vo hiila ban gayā is zaḳhm kī tash.hīr kā

haañ vahī sarkash mujhe ik jā nazar aaya thā kal

sar jhukā kar sun rahā thā faisla taqdīr kā

kartā huuñ īzā-e-tanhā.ī kī tadbīreñ bahut

kāv-kāve imtihāñ letī hai har tadbīr kā

āgahī ne chup kiyā aisā ki shahr-e-shor meñ

na.ara-e-haq rah gayā hissa merī jāgīr kā

hai tariqa koi KHwab-e-wasl ki tabir ka

mere us ke darmiyan parda hai ek taswir ka

zikr tera tark karna hai mere gham ki dawa

muntazir hun is mujarrab nusKHe ki tasir ka

yaad mein teri taDap kar haal-e-dil karna raqam

murtakib hota hun main har shab isi taqsir ka

zaKHm-e-dil ko Dhankne ka ek wasila tha suKHan

phir wo hila ban gaya is zaKHm ki tashhir ka

han wahi sarkash mujhe ek ja nazar aaya tha kal

sar jhuka kar sun raha tha faisla taqdir ka

karta hun iza-e-tanhai ki tadbiren bahut

kaw-kawe imtihan leti hai har tadbir ka

aagahi ne chup kiya aisa ki shahr-e-shor mein

nara-e-haq rah gaya hissa meri jagir ka