hai tarjuman alam aur adib hai sardi

hai tarjumān alam aur adiib hai sardī

tabhī to nok-e-qalam se qarīb hai sardī

dimāġh arsh pe hai kāñptā zamīn pe hai

ai bande dars le umda ḳhatīb hai sardī

maiñ shaal oḌh ke jo baam par Tahaltī huuñ

payām-e-dost kī shāyad naqīb hai sardī

laraztī kāñptī maiñ ḳhud se kahtī rahtī huuñ

maiñ milne jā.ūñ to kaise raqīb hai sardī

havā bhī sard hai patjhaḌ bhī hai daraḳhtoñ par

firāq-o-hijr meñ lipTī ajiib hai sardī

basī huī hai fazā meñ vo farhat-añgezī

sulagte zaḳhmoñ kī behtar tabīb hai sardī

'sabīla' mausam-e-sarmā bhī ek ne.amat hai

vo ḳhush-nasīb haiñ jin ko nasīb hai sardī

hai tarjuman alam aur adib hai sardi

tabhi to nok-e-qalam se qarib hai sardi

dimagh arsh pe hai kanpta zamin pe hai

ai bande dars le umda KHatib hai sardi

main shaal oDh ke jo baam par Tahalti hun

payam-e-dost ki shayad naqib hai sardi

larazti kanpti main KHud se kahti rahti hun

main milne jaun to kaise raqib hai sardi

hawa bhi sard hai patjhaD bhi hai daraKHton par

firaq-o-hijr mein lipTi ajib hai sardi

basi hui hai faza mein wo farhat-angezi

sulagte zaKHmon ki behtar tabib hai sardi

'sabila' mausam-e-sarma bhi ek neamat hai

wo KHush-nasib hain jin ko nasib hai sardi